Maliyyə Tədris Mərkəzinin tanıtım videosu



Naxçıvan Muxtar Respublikası Ali Məclisi Sədrinin 10 fevral 2018-ci il tarixli Sərəncamı ilə yaradılmış Naxçıvan Muxtar Respublikası Maliyyə Nazirliyi yanında Maliyyə Tədris Mərkəzi muxtar respublikada maliyyə və mühasibatlıq sahəsində çalışan işçilərin peşə hazırlığının təkmilləşdirilməsi, ixtisaslarının artırılması və yenidən hazırlanmasını, təhsilin yekunlarına görə dinləyicilərin peşəkar biliklərinin və işgüzar keyfiyyətlərinin qiymətləndirilməsini və bu sahədə digər zəruri tədbirlərin görülməsi işini həyata keçirir. Maliyyə Tədris Mərkəzində təşkil olunmuş təlimlərdə elektron-hesablama texnikasından, müasir elmi-texniki informasiyadan səmərəli istifadə edilməsinə diqqət yetirilir. Təlimin keyfiyyətini yaxşılaşdırmaq məqsədi ilə, təlimin ikinci hissəsində əldə edilən biliklər və vərdişlər konkret məsələlərin praktiki həllinə istiqamətləndirilir. Təlimlərin effektivliyinin ölçulməsi və iştirakçıların bilik səviyyələrini öyrənmək məqsədi ilə kursun əvvəlində və sonunda test tapşırıqları vasitəsi ilə diaqnostik qiymətləndirilmələr aparılır. Bütün təlimlərdə iştirakçılara tədris prosesində və öz günlük işlərində faydalı ola biləcək təlim materialları təqdim olunur. Hər təlimin son günündə qiymətləndirmə mərhələsindən sonra iştirakçılara Maliyyə Tədris Mərkəzinin sertifikatları təqdim edilir.
https://www.youtube.com/watch?time_continue=4&v=TTCjqHw00nE
DAVAMI
  • 46

Azərbaycanın Respublikasının vahid büdcə təsnifatı təsdiq edilib

Azərbaycan Respublikasının büdcə gəlirlərinin və xərclərinin funksional, iqtisadi və inzibati təsnifatından ibarət vahid büdcə təsnifatı təsdiq edilib. Bu barədə Baş nazir Novruz Məmmədov Qərar imzalayıb.11 oktyabr 2018-ci il tarixli 440 nömrəli Qərara görə, Azərbaycan Respublikasının dövlət büdcəsindən maliyyələşən və maliyyə yardımı alan təşkilatlar, icmal büdcə ilə əhatə olunan qurumlar vahid büdcə təsnifatının tətbiqinə 2020-ci il 1 yanvar tarixindən başlayır.


Azərbaycan Respublikasının dövlət büdcəsindən maliyyələşən və maliyyə yardımı alan təşkilatlar, icmal büdcə ilə əhatə olunan qurumlar 2020-ci ilin icmal və dövlət büdcəsi layihələri ilə bağlı 2019-cu ildə tərtib edəcəkləri sifarişlərini vahid büdcə təsnifatına əsasən Maliyyə Nazirliyinə təqdim etməlidirlər.

Maliyyə Nazirliyi vahid büdcə təsnifatını Azərbaycan Respublikasının dövlət büdcəsindən maliyyələşən və maliyyə yardımı alan təşkilatlara, icmal büdcə ilə əhatə olunan qurumlara elektron və kağız daşıyıcılarda çatdırılmasını təmin etməli, bununla bağlı tələb oluna bilən xərclərin maliyyələşdirilməsi barədə təkliflərini 1 ay müddətində Nazirlər Kabinetinə təqdim etməli, dövlət büdcəsindən maliyyələşən və maliyyə yardımı alan təşkilatlara, icmal büdcə ilə əhatə olunan qurumlara vahid büdcə təsnifatının tətbiqi ilə bağlı mütəmadi olaraq metodiki yardımların, təlimlərin və digər zəruri təlimatların göstərilməsini həyata keçirməli, büdcə ili ərzində təşkilatlar yaradıldığı, ləğv olunduğu və yenidən təşkil edildiyi təqdirdə, vahid büdcə təsnifatının “Azərbaycan Respublikasının büdcə xərclərinin inzibati təsnifatı”nda müvafiq dəyişikliklərin aparılmasını həyata keçirməli, bu qərardan irəli gələn digər məsələləri həll etməlidir.

DAVAMI
  • 38

Sığorta işinin təşkili məsələləri müzakirə edilib

Naxçıvan Muxtar Respublikası Maliyyə Nazirliyində dövlət büdcəsindən maliyyələşən təşkilatlarda sığorta işinin təşkili məsələləri ilə bağlı tədbir keçirilib. Tədbiri giriş sözü ilə açan maliyyə nazirinin müavini Elçin Əliyev sığortanın müasir cəmiyyət həyatındakı rolundan və dövlət maliyyə siyasətinin həyata keçirilməsindəki əhəmiyyətindən danışıb. Sonra Naxçıvan Muxtar Respublikası Dövlət Baş Sığorta Agentliyinin baş direktoru Hikmət Əsgərov çıxış edərək bildirib ki, muxtar respublikamızda sosial-iqtisadi inkişafın sürətlənməsi ilə sığortaya olan maraq artmaqdadır. Çünki insanların həyatı, sağlamlığı və əmlakının qorunması üçün zəruri tədbirlər görülsə də, qaçınılması mümkün olmayan hadisələr baş verə, insanlara hər hansı bir formada zərərlər dəyə bilər.

Qeyd olunub ki, Naxçıvan Muxtar Respublikasında sığorta işinin müasir tələblər səviyyəsində qurulması istiqamətində ölkəmizdə qüvvədə olan qanunlara əsasən bir sıra icbari və könüllü sığorta növləri üzrə işlər aparılmaqdadır. Bu baxımdan sığortanın müasir tələblərə uyğun şəkildə qurulması işin də 2011-ci il 30 noyabr tarixdə Naxçıvan Muxtar Respublikası Ali Məclisində “Muxtar respublikada sığorta fəaliyyəti və qarşıda duran vəzifələr barədə” keçirilən müşavirənin xüsusi əhəmiyyəti vardır. Tədbirdə iştirak edənlərə avtonəqliyyat vasitəsi sahiblərinin, daşınmaz əmlakın icbari sığortalarının mahiyyəti, əhəmiyyəti, həyata keçirilməsi prosesi barədə ətraflı məlumat verilib. Maliyyə nazirinin müavini Elçin Əliyev tədbirə yekun vuraraq baş verən gözlənilməz hadisələrdən dəyən zərərlərin əvəzinin ödənilməsi zamanı sığorta işinin əhəmiyyətini bir daha qeyd edərək hər bir idarə, müəssisə, təşkilat və vətəndaşları bu sahədə fəallıq göstərməyə çağırıb.

DAVAMI
  • 50

Oktyabrın 11-i ümummilli lider Heydər Əliyevin ikinci dəfə Azərbaycan Prezidenti seçildiyi gündür

1998-ci il oktyabrın 11-də Azərbaycanda növbəti prezident seçkiləri keçirilib.

Ulu öndər Heydər Əliyev xalqın yüksək fəallığı şəraitində keçən seçkilərdə səslərin 76,1 faizini toplayaraq yenidən Azərbaycan Respublikasının Prezidenti seçilib.


Həyatının mənasını xalqına və dövlətinə xidmətdə görən Ulu Öndərin müstəqil gənc respublikamıza rəhbərlik etdiyi dövrdə gördüyü əvəzsiz işlər Azərbaycanı çox qısa müddətdə beynəlxalq arenada böyük nüfuza və söz sahibinə malik bir ölkəyə çevirdi. O vaxt ölkəmiz dövlət müstəqilliyini yenicə bərpa etmişdi, Azərbaycan Ermənistanla müharibə şəraitində idi. Bu risk doğuran amillər böyük dövlətləri və şirkətləri Azərbaycana sərmayə yatırmaqda ehtiyatla davranmağa vadar edirdi. Ulu Öndərin beynəlxalq arenadakı şəxsi nüfuzu tərəddüdlərə son qoydu: 1994-cü il sentyabrın 20-də Azərbaycanın ən yeni tarixində dönüş nöqtəsi olan neft müqavilələri imzalandı. Sonradan “Əsrin müqaviləsi” adlandırılan bu Saziş ölkəmizin gələcək inkişafına və təhlükəsizliyinə etibarlı zəmin yaratdı, dünya xəritəsindəki mövqeyini möhkəmləndirdi. Azərbaycan artıq bütün dünyada neft ölkəsi olaraq tanınmağa başladı.

Ulu öndər Heydər Əliyev zamanın çağırışına cavab verən, zamanı qabaqlayan dahi şəxsiyyət idi. Onun fəaliyyəti sabaha ünvanlanan fəaliyyət idi. Heydər Əliyev Azərbaycan xalqının yaddaşında qurucu və xilaskar dövlət xadimi, ümummilli lider və xalq məhəbbətini qazanan ulu öndər kimi qalıb. Xalqımızın tarixi taleyində, mənəvi, siyasi və ictimai həyatında, dövlət quruculuğunda onun qədər misilsiz xidmətlər göstərmiş ikinci dövlət başçısı və siyasi lider tapmaq mümkün deyil.

DAVAMI
  • 51

Bakıda Mühasibat Uçotu üzrə Koordinasiya Şurasının iclası keçirilir

Oktyabrın 4-də Azərbaycan Respublikasının Maliyyə Nazirliyində “Müstəqil Dövlətlər Birliyi yanında İcraiyyə Komitəsinin Mühasibat Uçotu üzrə Koordinasiya Şurasının XV iclası öz işinə başlayıb.

İki gün davam edəcək iclasda ümumilikdə 8 ölkənin o cümlədən, Azərbaycan, Belarus, Qazaxıstan, Qırğızstan, Moldova, Rusiya, Tacisiktan, Özbəkistan və Müstəqil Dövlətlər Birliyi yanında İcraiyyə Komitəsinin nümayəndələri iştirak edir.


XV iclasın gündəliyinə 2016-2020-ci illəri əhatə edən Müstəqil Dövlətlər Birliyinin iqtisadi inkişaf strategiyasının III mərhələsinin həyata keçirilməsi ilə bağlı tədbirlər planının icra vəziyyəti daxildir.

Bundan başqa, Koordinasiya şurasının üzvləri milli mühasibat uçotu sisteminin inkişafı, o cümlədən təsərrüfat subyektləri tərəfindən beynəlxalq standartların tətbiqi və həmin subyektlərdə uçot siyasətinin formalaşdırılması ilə əlaqədar ölkələrin təcrübələri, habelə auditor fəaliyyətinin tənzimlənməsi ilə bağlı milli sistemlərin inkişafı və Beynəlxalq Audit Standartlarının tətbiqi, habelə auditor xidməti bazarının mövcud vəziyyəti üzrə müzakirələr aparacaqlar.

Xatırladaq ki, Müstəqil Dövlətlər Birliyinin İqtisadi Şurasının 25 may 2000-ci il tarixli Qərarı ilə təsdiq edilmiş “Müstəqil Dövlətlər Birliyi yanında İcraiyyə Komitəsinin Mühasibat Uçotu üzrə Koordinasiya Şurası haqqında Qaydalar”ın tələblərinə uyğun olaraq adıçəkilən Şuranın əsas məqsədi milli mühasibat uçotu sistemlərinin Maliyyə Hesabatlarının Beynəlxalq Standartlarına uyğunlaşmasına təkan verməklə mühasibat uçotu sahəsində təşkilatların maliyyə hesabatlarının tərtib edilməsi üzrə vahid yanaşmanın təmin edilməsinə müvafiq tövsiyələrin verilməsindən ibarətdir.

DAVAMI
  • 62

1993-cü il 3 oktyabr – müstəqilliyin və davamlı inkişafın təməlinin qoyulduğu gün

3 oktyabr Azərbaycanın ən yeni tarixində mühüm əhəmiyyəti ilə seçilir.

Azərbaycan 1991-ci ildə öz müstəqilliyini yenidən qazansa da, 1993-cü ilin iyun ayının ortalarınadək ölkədəki mövcud vəziyyət onu sübut etdi ki, bu müstəqilliyin sütunları kövrəkdir. Müxtəlif yollarla hakimiyyətə gəlmiş naşı və bacarıqsız qüvvələrin fəaliyyətsizliyi, ölkədə özbaşınalığın artmasına, daxili sabitliyin pozulmasına və torpaqlarımızın işğalına səbəb olmuşdu. Artıq xalq başa düşürdü ki, ölkəni düşdüyü bu bəlalardan yalnız Heydər Əliyev dühası xilas edə bilər. Beləliklə, 1993-cü ildə ulu öndər Heydər Əliyevin  xalqın tələb və təkidi ilə yenidən siyasi hakimiyyətə qayıdışı, həmin il oktyabr ayının 3-də ölkə Prezidenti seçilməsi isə Azərbaycanda sabitliyin, inkişaf və tərəqqinin başlanğıcı olmuşdur.


Ümumilli lider Beynəlxalq maliyyə qurumları ilə münasibətlərə xüsusi diqqət yetirirdi. 1998-ci ilin dekabr ayında Beynəlxalq Valyuta Fondunun Azərbaycan üzrə missiyasının rəhbəri D.Ouenlə görüşdə o bildirmişdi: “Beynəlxalq Valyuta Fondu ilə Azərbaycan arasında əməkdaşlıq iqtisadiyyat və maliyyə sahəsində indiyə qədər gördüyümüz və gələcəkdə görüləcək işlərimizin böyük bir hissəsini təşkil edir. Hesab edirəm ki, Beynəlxalq Valyuta Fondu ilə Azərbaycan arasında əməkdaşlıq uğurludur  və ümid edirik ki,bundan sonra da uğurlu olacaqdır. Siz bizim maliyyə, iqtisadiyyat  məsələlərimizi  təhlil edirsiniz, araşdırırsınız və həmişə müstəqil fikir söyləyirsiniz, öz təkliflərinizlə, məsləhətlərinizlə bizə çox kömək edirsiniz”.

 17 dekabr 2001-ci ildə Heydər Əliyev BVF-nin nümayəndəsi C.Lyukman-Li ilə görüşmüş, ekspert bu görüşdə Azərbaycandakı islahatların nəticələrinin ruhlandırıcı olduğunu bildirmişdir. Beləliklə, beynəlxalq və mötəbər maliyyə təşkilatları da Heydər Əliyev siyasətinin uğurlarını etiraf edirdi.

Ümummilli lider Heydər Əliyevin rəhbərliyi altında Azərbaycanda vergi sisteminin strukturu və vergi sahəsində milli qanunvericilik bazası formalaşdırılmış, Vergi Məcəlləsi qəbul edilmişdir. Ulu öndərin təşəbbüsü və bilavasitə rəhbərliyi ilə vergi sistemində islahatlara başlanmış, vergi siyasətinin əsas istiqamətləri, vergilərin sayı və dərəcələrinin optimal səviyyəsi müəyyənləşdirilmiş, ölkədə vergi yükünün aşağı salınması, vergi menecmentinin müasirləşdirilməsi istiqamətində bir sıra uğurlar əldə olunmuşdur. Bu illər ərzində bütövlükdə liberal və rəqabətqabiliyyətli bir vergi sistemi formalaşdırılmış, Azərbaycanda sərmayəçilər üçün cəlbedici, sadə və eyni zamanda, şəffaf və sabit bir vergi sistemi qurulması istiqamətində əhəmiyyətli tədbirlər görülmüşdür.

DAVAMI
  • 49

Hərbi və hüquq-mühafizə orqanlarında çalışan maliyyə işçiləri üçün növbəti kurslara start verilib

Naxçıvan Muxtar Respublikası Maliyyə Nazirliyi yanında Maliyyə Tədris Mərkəzi büdcə təşkilatlarının maliyyə və mühasibatlıq işində çalışanların mövcud biliklərinin artırılması və ixtisaslarının təkmilləşdirilməsi istiqamətində işlərini davam etdirir.


     Tədris mərkəzi növbəti təlimə hərbi və hüquq-mühafizə orqanlarında çalışan maliyyə və mühasibatlıq üzrə mütəxəssisləri dəvət edib. Bu sahə üçün xüsusi hazırlanmış kursa 2018-ci il 2-5 oktyabr tarixlərdə Naxçıvan Muxtar Respublikası Ədliyyə Nazirliyində və onun Penitensiar Xidmətində, Vergilər Nazirliyində, Dövlət Gömrük Komitəsində, Daxili Qoşunların “Naxçıvan” Əlahiddə Əməliyyat Briqadasında çalışan 18 mütəxəssis cəlb olunub. “Büdcə təşkilatlarında praktik mühasibatlıq” adlı kurs 5 moduldan ibarət olaraq Naxçıvan Muxtar Respublikası Maliyyə və Vergilər nazirliklərinin, eləcə də Naxçıvan Muxtar Respublika Prokurorluğunun ekspertlərinin təqdimatları üzrə mərkəzin tədris zalında keçirilir.

Təkmilləşdirici kursda Milli Mühasibat Uçotu Standartlarına əsasən hüquq-mühafizə orqanlarında maliyyə-mühasibat işinin aparılması, xəzinə əməliyyatlarının təşkili və uçotu, vergi uçotunun təşkili, hərbi hissələrdə və hüquq-mühafizə orqanlarında maliyyə hesabatlarının hazırlanması mövzuları ilə yanaşı, tədris prosesində ilk dəfə olaraq “Mühasibat uçotu işinin aparılması ilə əlaqədar hüquqi məsuliyyət” mövzusu üzrə məlumatların da əhatəli şəkildə iştirakçılara çatdırılması nəzərdə tutulub. Qeyd edək ki, kurs 4 gün, 12 tədris saatı olmaqla təşkil olunub, praktik məsələ və testlərin həllinə yer ayrılıb, eyni zamanda bir sıra mərhələlərlə – suallara cavab, testlərin işlənməsi və sorğu-anketlərin doldurulması ilə zənginləşdirilib. Bundan əlavə, tədris zamanı ekspertlər tərəfindən təlimçilərin müşahidə edilməsi təlimin daha effektli keçirilməsinə imkan verir. Həmçinin tədris prosesində iştirakçılara gündəlik işlərində faydalı ola biləcək təlim materialları – slaydlar, müvafiq sahə üzrə normativ-hüquqi aktlar, sənəd formaları, təlimatlar, qaydalar və misalları özündə ehtiva edən vəsaitlər təqdim olunacaq. Peşəkarlıq səviyyəsinin qiymətləndirilməsi mərhələsindən sonra dinləyicilərə Maliyyə Tədris Mərkəzinin sertifikatları təqdim ediləcəkdir.

Naxçıvan Muxtar Respublikası Maliyyə

Nazirliyinin mətbuat xidməti

DAVAMI
  • 46
Sosial şəbəkələrdə biz